杜汶澤日前趁住有時間，親自開車送老婆田蕊妮去時代廣場買化妝品，等到老婆買完嘢，就第一時送佢返屋企，貼心服侍認真係個好老公。
講起陪老婆買化妝品，上個月黎諾懿就陪住老婆李潔瑩行街買堅果油，當時囝囝「小春雞」都仲未出世，黎諾懿就全程扶實老婆。家庭以外黎諾懿落力工作賺錢，就算大台落order要佢拍煮食節目，佢都講明要有時間陪老婆坐月。
至於近年好男人嘅代表，就應該係佢：張繼聰！自從老婆謝安琪（Kay）話要暫別樂壇，張繼聰就一個人孭起成頭家，工作幾忙都抽到時間同大肚Kay 行街散步。囡囡張靖3月出世後，放工就返屋企湊女，前幾日仲凌晨起身餵奶，等老婆多啲時間休息。
努力搵奶粉錢嘅當然仲陳豪啦，佢同老婆陳茵媺（Aimee）自從13年結婚，三年抱三，三子女排住隊出世， Aimee未有時間復出，陳豪就做埋老婆個份，賺夠一家五口嘅使費。
而最近喺《全職沒女》發揮出色嘅張兆輝同太太結婚20年，一直冇傳過緋聞，用情專一令老婆好放心。唔只咁，張兆輝仲係位好爸爸，上個月有讀者見到佢同囡囡攬晒腰咁喺西貢散步，張太仲話兩父女感情好，除咗攬腰搭膊，平時仲會手拖手o添。