立法會「重量級」議員、經民聯金融服務界張華峰噚日65歲牛一，黨友林健鋒幫佢開咗個party，邀請同樣具份量嘅黨友石禮謙切蛋糕慶祝；黨內唯一女將梁美芬雖然有事早退，但都到場送上birthday kiss……有距離嗰隻。
狂鬧慶回歸節目無feel
最近肥佬張有壇「得意作」，就係公開批評政府用6億，搞成逾300項本地慶回歸20周年嘅活動，但佢就一頭霧水，唔明點解氣候變化跨課程專題比賽、長者義工活動等都同慶回歸有關？質疑係「交數」。
肥老闆向八方解釋，發火只因「忍無可忍」，繼而再力數原來舊年嘅除夕倒數都係慶回歸活動，但當晚嘅人係慶祝緊回歸咩？而且佢出席過一啲聲稱慶回歸嘅活動，「一啲（慶祝）feel都冇」，希望政府認真整頓一下，唔好乜都冠上慶回歸牌頭，仲即場叫身兼行會成員嘅林健鋒反映意見。
政壇呢排關心議題不外乎新政府組班，林健鋒笑言如果政府增設個美食部長，相信搵張華峰做就最啱，八方都相信肥佬張未必托手肘。而佢好關心歌手陳美齡係咪做教育局局長？同時笑住問（係笑住㗎吓）：「點解唔係舒淇做……」