英超殺入最後直路，球員求勝心切本來好正常，但三大強隊齊齊「出cheat」又係咩玩法？周日曼市雙雄率先嚟料，曼聯前鋒拉舒福特殺入禁區後跌低搏到12碼，但史雲斯門將法比安斯基明明縮晒手，兩粒鐘後到曼城翼鋒利萊辛尼喺禁區內疑似挨向米杜士堡中場迪魯恩嘅身體後倒下，結果兩場波嘅球證一樣「中伏」。
嚟到周一英超利物浦作客屈福特場波，盧卡斯喺43分鐘一次推右走左明明呃過屈仔中場湯卡華利，點知扮晒俾後者勾跌後插水跌低，今次球證就冇被騙到，向盧卡斯出示黃牌。其實盧卡斯幾分鐘後就交出漂亮助攻畀安利簡恩倒掛射入，又使乜出陰招呢？不過，眼見球員插水搏極刑成風，目前成為評述員嘅前英格蘭名將梅菲同伊恩胡禮，都喺節目呼籲英足總事後追究相關球員。梅菲表示：「你點樣幫助球證？事後究責係唯一方法，否則會有更多球員咁樣做。」伊恩胡禮就話：「的確有需要採取行動，因為呢件事係錯嘅，米堡、史雲斯，佢哋需要呢啲分數！」