最近睇教育界人士在報紙發表嘅文章，發覺討論小三TSA（現改為BCA）嘅論述甚多，撇開針對教育局局長吳克儉與教育局嘅言論不談，單係睇專業人士講理論、講實際，就有兩派不同意見。一派係教育局引用、支持嘅，就以中文大學前副校長，中文大學教育學院教育心理學講座教授侯傑泰為代表；呢派贊成有TSA，另一派係反對TSA嘅，以立法會議員葉建源（前香港教育學院講師）為代表，發文直接或間接批評侯傑泰意見嘅，有香港中大教育系客座教授曾榮光及香港大學教育學院權威教授程介明。侯傑泰一人力戰三位教育界知名人物，怕都幾吃力。
左丁山唔識咁多教育評核、測試理論，只知道TSA（BCA）對教育界有撕裂效果，家長意見紛紜，大部份都唔明白測試之箇中理由。左丁山問過一位小三學生怕唔怕TSA，佢話考試濕濕碎，學校係着重催谷，但佢應付得來；又問過另一位小三學生家長，佢就大力反對，話唔想太多操練，摧殘學童。
既然連啲教育界大教授都為TSA打筆戰，一位學校校長邵修女又與葉建源筆戰，又好難怪家長都分為（一）支持，（二）冇所謂，（三）堅決反對，共三大陣營，碰啱現任教育局長吳克儉並非一個可以拉攏、融合不同意見嘅人物，佢本人就具備分化性、爭議性，誠香港教育界之不幸也。下任特首，下任教育局長可唔可以調解正反雙方不同意見，讓教育界「休養生息」呢？林鄭月娥大概會傾向取消BCA（現教育局官員反對如此），新局長不知是誰，網媒「眾新聞」傳出會係過去著名歌手陳美齡擔任，嚇咗好多人一跳，大家都以為陳美齡入咗日本籍㖭，憑佢本暢銷書「50個教育方法，我把三個孩子送入史丹福」就可以做香港特區教育局長？咪開玩笑啦，林鄭月娥唔會咁天真嘅，但新聞竟然有如此傳聞或可證實林鄭埋班困難，有少少發茅嘞。
放假前碰到兩位年青教師皆來自名校，佢地分別去兩間中學監考中三TSA，左丁山於是問佢地學校如何看待中三TSA，佢地異口同聲話：「中三TSA水平好普通啫，我地學校學生認為易過食生菜，唔駛準備就去考，我地亦從不操練中三學生考TSA。」一位去到一間Band1英中，見到早上學生魚貫入校上課，校長老早站在門口睇住，學生個個向佢鞠躬好好禮貌，而抽出嚟應考嘅學生亦個個成績好好，考TSA好輕鬆；另一位就去咗一間Band3中學，只見學生在校嘈喧巴閉，秩序規律欠奉，校長守住辦公室內，而考TSA嘅學生幾乎係考試擔梯格，呢兩位教師講起，方知學校差距之大！