【六七暴動50周年系列三之三】
【本報訊】昔日少年犯（YP），今日再見，早白了少年頭。六七暴動半世紀過去，有人堅持造反有理；有人反思歷史，不再相信「爹親娘親不及毛主席親」，67歲的高兆楨，是其中之一。當年因為幾十張傳單、一句黃皮狗，17歲的他被判監30個月。「事後上庭，知被我鬧的警察，原來叫袁錦洪。」50年過去，他說希望一聲道歉可化解恩仇，「至少，讓個人鬥爭畫上句號」。他說如今只希望照顧好90歲的媽媽，平靜走完餘下時光，真正放下。「帶着仇恨生活好辛苦。」他說。
記者：呂麗嬋
陪高兆楨來老人院探望媽媽，不時見到職員和他打招呼：又嚟咗探阿媽呀？只能以胃喉進食的高媽媽，在輪椅上閉着眼，𠵱𠵱哦哦的說着潮州話，記者聽不懂，高兆楨在旁解畫：「你咪見佢咁，佢仲好醒，話知我嚟探佢好開心。」由朝到晚，由西營盤坐港鐵到荃灣，像長征，風雨不改。「好慶幸當年冇死喺反英抗暴，如果唔係，阿媽最錫我，佢冇可能活到今日。」在50年前那場運動中，他直言最受傷害的，是媽媽。
見年輕人掟磚感心痛
「嗰時係全情投入，同佢講已作犧牲準備。」爸爸行船，媽媽是家庭主婦，不問世事，家貧，學校安排派報紙幫補家計。「海員家庭，大部份只會睇《文匯》《大公》，喺外國俾人蝦，民族感情特別強。」8歲來港，記憶中的故鄉很美好，可以夜不閉戶。「內地經歷不同政治運動，人係會變，但美好嘅回憶卻會保留。」身為獨子，自小與媽媽相依為命。「出監時，見到佢成個落晒形，覺得好對唔住佢……」說起往事，高兆楨多次激動得流下淚來。
50年前，17歲的高兆楨，在中華中學就讀中三，1967年11月10日晚上，放學回家途經醫院道，被7、8名警員攔截，發現書包藏有「反英抗暴小報」。他憶述當時警察說：「原來你係死左仔」，他當下氣上心頭，回敬「黃皮狗」，立即被圍毆。後來上庭，被控以發動煽動性演說、阻差辦公及藏有煽動性標語入罪，判監30個月。
當年是學校鬥委會成員，一腔熱血，但他說不認同往後左派一些過激行為，包括自製真假菠蘿，傷及無辜。「唔好用暴力行動實現理想，無論理想有幾崇高、理由有幾充份……等於你有七兄弟姊妹，大家唔同信仰，各自尊重就好，點解一定要搞到水火不容？」
「年輕人都係有熱情有理想，𠵱家見到啲後生仔因為掟磚頭被判監，係好心痛，冇考慮過後果，出獄之後，將來嘅人生，始終要自己去面對。」年少氣盛，由撩人者賤仇深似海，到渴望釋懷、平靜過日子，高兆楨直言，當中經歷過漫長的反思。「警察唔係我敵人，要放低，我同林占士（當年平暴警司）都可以坐低飲茶，成為朋友。」
嘆左派圈子思想狹窄
「好多人唔想再提，唔畀仔女知；唔喺左派機構做嗰啲，出獄後，身體差、生活冇着落，鬱鬱而終。」政治無情，他直言被時代捲進漩渦，到黃昏之年只想逃得遠遠，遠離政治。「出獄之後，睇番好多西片，《齊瓦哥醫生》、《午夜快車》、《早春二月》……」他說：「以前睇《海神號遇險記》，要掩面入去戲院，西方思想係毒草，𠵱家睇番，係好狹窄，點解要咁狹窄？知多啲，起碼可以分清真假，但你喺嗰個圈子成長，就係咁樣。」
對於平反，他看得淡，畢竟，偉大光明正確，是共產黨嗌了多年的口號，怎可能認錯？「我心照明月，明月照溝渠，如果個阿媽50年唔認仔，你再求都冇用，係時候放下。祖國遺棄你，我仲有阿媽，佢永遠最在乎你，喺度默默等你。」左派出身、出獄後獲安排到中資銀行工作，高不諱言他這樣說是離經叛道，會被批評，但他說已不在乎。「我都67歲，冇結婚冇仔女，就只有呢個阿媽，唯一希望係可以照顧好佢，真正可以實話實說。」
「唔想一個謊言冚另一個謊言，咁樣好冇意思。」回首前塵，他謂不贊成以暴易暴：「當年林彬係火上加油，但言不入罪，唔應該死，呢樣嘢，肯定係錯。」大時代小人物，他說今年之後，希望真正放下。
「每次講都好傷心，今年50周年，希望係最後一次接受訪問，最多搵到袁錦洪（50年前被他罵的警察），叫埋你一齊飲茶，不過如果佢仍然在生，應該都已經70幾啦啩？」他說。
【話你知】一場人造花廠工潮 六七暴動一觸即發： http://bit.ly/2oOYQwp