港產名醫出手，伊巴謙莫域嘅職業生涯有救，我求大俠希望下年可以睇到伊巴喺球場踢波嘅風采！伊巴經理人拉奧拿禮拜一發聲明，話喺香港出世嘅名醫傅浩強（小圖）親自操刀，伊巴嘅膝部手術成功；嚟緊伊巴會留喺美國養傷，由傅浩強嘅醫療團隊協助佢慢慢復元。拉奧拿強調，伊巴呢次受傷唔會威脅到佢嘅球員生涯，可以完全康復。外界估計，伊巴應該無法趕及今年復出，可能到下年先至可以踢波。35歲嘅伊巴喺上個月嘅歐霸盃八強整傷膝頭，搞到十字韌帶撕裂。至於上場聯賽對史雲斯傷出嘅左閘勞基梳爾，睇怕要收「咧」。據曼聯消息話，梳爾嘅足踝受傷，估計休戰四周，即係今季剩番啲波都唔使預佢。