朋友越洋問香港近況如何，粗略告之：
一，3字頭來電，是繼689、777之後，最令人抗拒的數字。朋友說早知一不離二（所以有2.0），二不離三，小三乞人憎過阿二，小三TSA困死晒小學雞，而特權階級一個人有三票，最惡頂。
二，美齡局長，甚囂塵上。朋友大喜，說嫁人的確要嫁日本人，生仔必然入讀史丹福，美齡獨有這種必殺技。朋友建議那支「香港，香港」盡快改編成「日本，史丹福」，肯定攞金曲。
三，大灣區被熱捧。朋友唔知邊度係大灣區，唔明點解粵港澳要將香港排第二，被粵澳兩邊挾實，走唔甩咁解嗎？嗯，真係愈睇愈似三文治，如果係熱狗，上下夾住，中間條腸仔，識飛都假。估計很快會收到3字頭電話，以粵語發聲，叫市民去大灣區開定銀行戶口，等住恩平公安部的匯款指示。信者，得器官移植優先卡。
四，迪士尼拆卸重建，足夠容納未上到公屋的輪候長龍。朋友以前在樂園留下唔少腳毛，說要趕回來遞申請表。我叫她等下一輪更靚的西九故宮公屋地皮。她醒水，不忿大叫「柒柒柒！呃鬼3字頭！」