隨住快艇喺周日NBA季後賽西岸首圈「搶七」不敵爵士後，綽號「真理」（The Truth）、征戰NBA 19個球季嘅老將皮雅斯（Paul Pierce）亦告退役，唔少球壇巨星都向佢送上祝福，其中拜恩（Kobe Bryant）、加尼特（Kevin Garnett）等更齊齊拍片致敬。另外，PP最初15季職業生涯都喺塞爾特人度過，2008年更為球隊贏得總冠軍，有美國媒體周一就引述綠軍班主古斯碧克（Wyc Grousbeck）指，球隊將會為PP當年效力所穿嘅34號球衣舉行退役儀式，令佢成為第22位獲綠軍退役球衣嘅球員。
不過，所謂「一樣米養百樣人」，唔係個個球員都對PP咁尊敬，現時效力巫師嘅後衛B贊寧斯（Brandon Jennings）就唔多畀面，喺twitter表示：「1隻冠軍指環唔代表你應該有告別巡遊。（1 ring don't mean you should get a farewell tour.）」雖然佢其後極速刪tweet，但網民圖已cap水洗都唔清了，抑或呢個tweet都係巫師對塞爾特人嘅東岸次圈matchup心理戰一部份？