早前有份出席曾俊華生日會嘅政壇元老「飛哥」李鵬飛，噚日現身港台英文論壇時，為當選特首嘅林鄭月娥平反，佢話唔同意林鄭係CY 2.0，相信林鄭會如早前所講，若港人主流意見令佢無法再做特首，真係會辭職。飛哥大讚林鄭份人好勤力，「最慘係佢（林鄭）以為自己叻過晒其他人」，認為林鄭唔會好似梁振英咁好鬥，深信會為香港政治帶來改變，「我認為佢會講真話」。
飛哥對林鄭新政樂觀，但就對中聯辦法律部部長王振民話香港未來5年不宜重啟政改感到「好㷫」，形容王只係一個「官仔」：「佢（王）有乜資格咁講？佢代表晒成個中國咩？」批評王咁講令港人好反感，因為港人等普選至今已30年，「你要香港再等30年？我諗香港社會會有好大動作」。