今季港超聯第二項淘汰賽決賽—菁英盃，周三喺旺角場進行，兩支爭標球隊香港飛馬同和富大埔周日如常照操，其中飛馬就為決賽試陣，雖然教練奇雲邦特話季內對大埔未贏過，但季中加盟嘅陳肇麒就信心爆棚，仲話呢場決賽冇得輸；佢哋亦冇練12碼，睇嚟有啲把握衞冕喎。至於早排膝傷嘅大埔港腳伊達有跟足大隊操練，不過，教練李志堅話伊達仲未十足，上陣機會仲係五五波。