胡渭康係80年代紅極一時嘅「小虎隊」成員，解散後胡渭康四出登台，及至11年回流返港，重現幕前。50歲嘅胡渭康感情生活神秘，曾爆出有「斷背緋聞男友」劉振宇（阿水），胡渭康唔介意之餘，仲笑住話阿水被叫「胡太」，自己呢個年紀好想有伴。前日胡渭康孖住矮佢一個頭嘅四眼大隻男，去銅鑼灣連鎖時裝店ALAND掃平衫。
全店焦點
由於店中多數係女顧客，所以一頭金毛嘅胡渭康好搶眼，被人眼望望。胡渭康先揀咗一大堆衫褲，拎去試身室，同性友人就全程貼身傍實，仲細心畀意見，又企喺門口等。胡渭康首輪試身用咗10分鐘，佢都有幾件啱心水，之後再試，決定買邊啲後就去排隊畀錢，兩男邊等邊吹水，仲咬晒耳仔，面露笑容。其後發現有記者，胡渭康使開男伴，叫對方先行離去，淨低自己排隊。
話晒係藝人，形象好緊要，胡渭康姿整撥頭髮，買完衫離開時，仲刻意戴番副超，同埋將身上斜孭袋放喺身前，凸顯強國味。
撰文：馮仁昭
