【本報訊】「因為有昔日嘅雞蛋變咗高牆，你就否定晒當年所有嘅雞蛋？」在飄着米字旗的殖民地香港，讀番書、一度以為自己是「小英國人」的六七少年犯（YP）石中英（筆名），當年因身懷「愛國無罪」單張入獄。今日已屆花甲，這個早移居澳洲的工業家，卻在港成立「六七見證」，又出版六七系列、拉攏電影人籌拍電影，甚至找中大教授為少年犯口述歷史存檔。他說只為歷史補白：「唔好叫我幕後金主，你唔做佢唔做，到有人做，你就懷疑點解做，香港幾時變成咁？」他帶點火的反問。
今年後退出 真正放下
石中英的公司位於灣仔對正電車路，會議室內掛着大幅題字。「中央圖書館牆上面嗰幾隻大字，都係我呢位YP朋友寫」。「為了忘卻而回憶，冀盼放下而求索」，他謂是過去數年的心路歷程，短短5年間，由他一手創立的「火石文化」及「石中英工作坊」，共出版了6本有關六七暴動的專書，包括屈穎妍撰寫的《火樹飛花》，由人物訪問、散文到劇本和繪本；又資助劇團籌辦紀錄劇場及音樂劇，而即將煞科的電影《五月》，他更是出品人。
「做埋今年我會退出，唔會再掂六七，真正放下」。沉默了45年，5年前突然出錢出力重塑敏感歷史，有人驚嘆天降金主，但更多是質疑他的動機，和他保持距離，本名楊向杰的石中英自言受屈。「左派問：你係咪想對抗中央、係咪想平反六七？」不喜歡左派的人則懷疑他漂白歷史，為共產黨塗脂抹粉。
不容於左報，到早兩月被指「挖阿爺瘡疤」的《消失的檔案》公映，石一度全力協助導演羅恩惠找YP接受訪問，甚至以金錢資助她製作。石中英指早前也有「中央政策研究組」的人找上門，「邊個就唔好講，佢話呢啲話就話係民間活動，但都要注意吓立場」，「我點解要混呢趟渾水？」像自問又像反問。
只是，一段歷史，影響香港前途，亦讓他捲進漩渦，他謂想在黃昏之年，弄清楚來龍去脈，強調這是初心。「以前做生意，成日唔喺香港，幾年前60歲開始諗退休，慢落嚟會諗：16歲時點解會做YP？到處搵書睇，發現咁多年，香港只有3本半書講呢段歷史」。年輕時是文藝青年的他認定，文字與研究是最好的紀錄：「好多YP已經係老人家，一係走咗被遺忘，一係放唔低，一時要求向人大委員求助，一時又話要去信北京同英國政府，要求平反。」
石的辦公室有一幅「悼念牆」，「每次有YP走咗，我都貼出嚟，提醒我要喺有生之年記錄歷史，講佢哋嘅故事。有人覺得冤屈、有人覺得光榮、有人覺得被出賣，咁咪由每個人講佢哋嘅故事，你睇完，話暴徒好、英雄好，由外面嘅人、由歷史去評價就好」。
「近幾年最大感受係，每個人都只睇到自己認定嘅真相，但我仍然相信，真相喺時間裏，只係我哋呢一、兩代仍未睇得清」。都說戰爭之下，首先被犧牲的一定是真相，那真相是否真的存在？石中英引述李怡專欄所寫：「歷史除了年代和人名是真，其他都是假；小說除了年代和人名是假，其他都是真的」。縱然每個人的視點會受成長背景、自身經歷，甚至記憶影響，但由碎片拼湊，他說真相也就不遠。
■記者呂麗嬋
