泥地王返嚟喇！周日舉行嘅巴塞隆拿網賽男單決賽，東道主球手拿度只用咗90分鐘，就以6:4、6:1輕取奧地利嘅迪安，繼上周蒙地卡羅網賽後再次喺同一項賽事10度封王。
巴塞隆拿可以話係拿度嘅福地，因為10次打入決賽都奪冠。30歲嘅拿度喺賽後話：「喺一班鄉親父老面前比賽，加上喺呢個賽事第10次捧盃，對我嚟講特別有意義。」拿度喺今季21盤泥地賽事只輸過一盤，而佢跟住落嚟嘅目標，一定係喺今個月28號展開嘅法網，亦係問鼎第10冠。不過，拿度要喺今屆法網封王，都要問過宿敵費達拿；現年35歲嘅瑞士天王雖然曾經透露想休息多啲而退出今季泥地賽，不過周日就話：「我報咗名參賽，好希望可以出戰法網。」