圈中有唔少名人明星都有同性密友，好似名填詞人黃偉文（Wyman）咁，有個相知相交超過10年嘅醫生密友吳偉民（Stephen），佢哋幾年前被《蘋果》影到孖住現身中環皇后大道中，夜蒲完去食消夜路上，兩人先後幫對方按摩膊頭，Stephen更當街擁抱Wyman，又sweet又溫馨。
喺2012年公開出櫃嘅歌手何韻詩，舊年底被揭背住台灣女友鄧九雲搭上入職只有數月嘅新助手方迦南，有指方迦南落力冧掂阿詩身邊助手及哥哥，務求盡快混熟；後來更有傳媒影到阿詩同方迦南喺貝沙灣激咀，而鄧九雲則喺社交網貼黑白相，疑「宣佈」分手。
至於圈中模範夫婦之一嘅王敏德同馬詩慧，佢哋其中一位千金王曼喜（Kayla）年前公開出櫃，佢曾坦言講咗出嚟輕鬆晒，佢父母都支持女兒嘅決定。而Kayla孖同性密友Lia曾被《蘋果》影到喺公園談心時，摸黑咀嘴。