「作為一個從事美術創作嘅人，我覺得八十年代，由時裝到設計，全部都好肉酸。」當人人爭住向八十年代致敬，八十後漫畫家白水偏偏唔跟大隊，反其道而行！「嗰個時代有嘢值得懷念，但唔使放大。香港人懷緬八十年代，係懷緬魚翅撈飯嘅風光時代。」佢就寧願以圖文為香港記錄進入革命性高科技世代的九十年代。畫開政治漫畫《溫水劇場》嘅白水，早前喺網上有個經營了兩年的專欄《嘔電傳真機》，筆下全是九十年代集體回憶，佢準備結集成收錄90篇漫畫的圖文書，每篇內容除了三格漫畫，還有文章記載事物。
Call機、Fax機、 字典機、MD機，𠵱家睇落過時，當年都叱吒一時。除新科潮物湧現，佢回看九十年代，仲有好深體會。「由宏觀到微觀，九十年代都係一個大時代轉捩點，我哋進入互聯網時代、手機時代。嗰個年代打好多仗，共產政權相繼倒台。就連香港主權移交，都發生喺九七年。」九十年代唔多久遠，嗰陣又有互聯網，資料應該易搵吧，件事原來唔係咁。「我只係想搵藍戰士雪條個樣，我發覺網上係無資料，可能因為Server更新，好多嘢都無晒，大家都以為放咗上網就係一世。」他又提到想畫nowTV的前身互動電視iTV， 資料一樣少得出奇。「想搵番個電視盒個樣都搵唔到，佢其實超級超前，類似Apple TV同Netflix，隨時透過網絡下載節目來睇，首次發布比蘋果仲要早十年。可惜當年寬頻速度得1.5Mb，下載一部戲要數以日計，佢做唔住。」佢慨嘆雖然這種傳輸影像技術咁劃時代，但太快被淘汰，那段歷史也無乜人重視。
新書今次不經出版社出版，目標係賣出600本，每本$98。「計過條數，咁樣就可以畀番編輯、排版、校對市價酬勞，唔想剝削任何一方。」畫開政治漫畫，當然也曾受某紅色背景發行及零售商「招呼」，加上出版社支援不足，令佢對現行出版制度意興闌珊，所以今次寧願自己搞眾籌招恩客。
Facebook：溫水劇場
記者：葉青霞
攝影：劉永發
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily