人稱「水哥」嘅恒生銀行（011）傳訊及可持續發展總監張樹槐，出版新書《跑出一片天》，除記述成長經歷，亦分享過去15年參加馬拉松、長跑、毅行嘅感悟，水哥話本書唔係教人跑步，而係傳遞奮發自強嘅馬拉松精神。
《跑》全書190頁，分為四章，記載跑步以至人生經歷、路上遇見的人和事等。本書除咗獲恒生一姐李慧敏寫推薦序，仲有國學大師饒宗頤賜贈「跑」字墨寶、長實集團前中文秘書李慶欣題字，可見水哥人脈之廣。
水哥話，5年前已經開始諗著書，不過諗住跑多啲、儲多啲經驗、故事，先同大家分享，舊年就的起心肝揸住筆桿，「又要工作，又要跑步，又要兼顧家庭、教會，真係唔容易㗎。」
《跑》放喺書店入面，並非列入運動類刊物，而係勵志類。水哥話，本書並非教人跑步，而係從自身長跑故事，啟發當今社會馬拉松精神，面對人生順逆時，唔好睇低自己，要喺賽道上延展一片天。
水哥喺書中由小時候成長開始娓娓道來－－柴灣寮屋出身，入讀中大新聞及傳播學系；再由記者做起，轉行成為金融機構嘅傳訊一哥；到中年先開始「起跑」，2002年至今，完成超過60個馬拉松，包括世界海拔最高的珠穆朗瑪峰，的確「跑出一片天」。