新世界發展（017）第三代接班人鄭志剛（Adrian）一向致力推廣藝術，佢主導嘅旺角波鞋街新盤Skypark近日收樓，華華因此有機會參觀一個充滿藝術泡泡嘅頂樓clubhouse。
Adrian搵來荷蘭設計師Rob Wagemans設計clubhouse，整個地方相當開揚，用盡頂樓優勢，又以空間感作為間隔，挺特別。其中一幅8米高牆，隨意掛上大小不一嘅畫作，好有從前法國salon嘅感覺，每幅畫嘅內容亦可堪玩味。
話明係Skypark，呢度有室外草地，仲有幾棵真樹，聽聞樹木係由地下吊上28樓，Adrian最初見到覺得太細棵，唯有等佢哋自己快高長大喇。