噚日五一勞動節，唔少打工仔上街爭取權益，建築、測量、都市規劃及園境界議員姚松炎則同中環街市關注組成員，親臨中環街市為街市慶生，皆因78年前嘅噚日，就係中環街市開張大吉嘅日子，關注組話當年公務局嘅建築師以現代建築手法設計同建造街市，為香港帶嚟一幢劃時代建築，亦標誌香港踏入現代社會。既然咁有本土特色，包括姚教授在內嘅關注組成員，力促市建局原汁原味保育中環街市。
但喺咁開心嘅日子，姚教授都有不忿事，佢去信立法會主席梁君彥，不滿對方處理《2017年撥款條例草案》修正案，喺諮詢政府同議員時厚此薄彼，畀政府嘅回覆時間多達10日，但議員卻只得一晚通宵時間回應政府「意見」，覺得做主席唔可以咁唔公平噃。