一講起民主黨黃碧雲，大家會諗起啲咩？梗係水啦，無論屋邨鉛水到近期再受關注嘅東江水，碧雲姨好貼地咁花咗唔少口水，但原來佢嘅家庭背景喺𠵱家嚟講可算「離地」，爸爸喺律師樓做師爺，60年代嚟講好巴閉㗎！
58歲嘅碧雲姨對上有3個哥哥、下有一個細佬，連埋爸爸媽媽，一家七口、5個男士，難怪佢自細培養出獨立、強悍嘅個性！佢話雖然係屋企唯一嘅女仔（當然唔計媽媽啦），但啲阿哥細佬冇特別照顧佢，好似食飯咁都係手快就食多啲餸，手慢就食白飯，可能係咁令佢自細明白所有嘢都要自己爭取。
由細到大九西打滾
中學讀九龍真光嘅碧雲姨，係中大宗教研究文學士同中大政治及公共行政哲學碩士，其後喺美國洛杉磯加州大學讀政治科學哲學博士。九真位於九龍城區，唔知係咪因為咁令碧雲姨對九西情有獨鍾？2012年開始做議員後一直以九西做據點，事實上佢同九西確有淵源，話說佢爸爸同爺爺都喺律師樓做師爺，須知道嗰個年代識洋文、幫律師做嘢已經好犀利，而律師樓有地方畀佢哋住，正正係紅磡區，難怪佢大聲疾呼我來自九西。
亦因為係小康之家，佢爸媽都好重視上影樓影全家福，喺佢攝於1965年嘅相可見，當時幾歲嘅小碧雲着得靚靚，爸爸同哥哥戴番頂唐裝帽，睇落碧雲細個個樣仲有啲似馮寶寶喎！
身為學者嘅碧雲姨80年代開始參與民主運動，爭取八八直選，1987年民主政制促進聯委會喺立法局外集會，佢都身在其中。原來佢大學畢業無耐中英就簽署聯合聲明，香港進入過渡期，佢由政治冷感變積極投身民主運動，可惜香港民主至今都冇乜寸進。
李八方