鍾欣潼（阿嬌）賣出荔枝角物業，平手離場。不過其實佢同好姊妹蔡卓妍（阿Sa）一樣，都喜愛買磚頭為資金保值。阿嬌除咗今次售出嘅「一號．西九龍」單位，原來佢亦都試過買入2,000呎貨倉，用嚟收埋佢啲衫。
至於自認數學差嘅阿Sa，平時工作賺到錢，就搵媽媽幫手投資買樓入市，包括前年購入自主嘅大潭紅山半島中層1,500呎單位，市值逾3千萬。
阿Sa又話買樓唔係為咗炒，只係好過放喺銀行，今年只係得34歲，估計至少有5個物業，全部都位於港島區，夾埋市值可逾8千萬，以上5個單位每月租金收入逾20萬！阿Sa早前受訪仲講過，人工係直接存入媽媽戶口，每月都要等媽咪出糧俾自己，佢嘅致富之道一個字講晒-「慳」。