雷神莫雷拉今午（30日）於沙田日馬先贏第二場蘇偉賢馬房「承你所願」，繼而第四場四班1400米，雷神再下一城起孖，策葉楚航馬房「海嵐一號」一放到底打開馬兒今季勝門，此駒單Win及組合獨贏A1分別派70及15.5元。而同場馬德鐘及陳玉蓮的合夥團體馬「快樂實在」2倍大熱梗頸四。
年屆八歲的「海嵐一號」本已接近一年不勝，呢次得到雷神垂青肯騎，唔係完全冇道理，事關人馬之前合作三戰一贏兩位全上名，當中包括於2013年勝出三班田草1200米。
這天「海嵐一號」和雷神人馬重逢跑四班1400米，排6檔起步，沿途均速前置跑主動，雷神盡顯步速智慧，就此由頭帶到尾贏頸位，爆半冷勝出，人馬亦告增至合作四戰兩冠一亞一季保持一百巴仙上名率。
第四場二至四名順序為「勝利歡星」、「常拼常勝」及「快樂實在」，四重彩派二萬七千幾。
其中年僅三歲的「快樂實在」以往兩戰直路都在外疊衝得甚勁，包括上仗以此跑法得亞軍，今次此駒騎師潘頓沿途大力扣實在後，入彎前曾有機會拉出外疊衝，但最終潘頓選擇走最內檔而上，結果沿欄空位不多衝得不算暢順下，2倍馬只輸0.75馬位大熱梗頸四，獨贏及位置彩池合共近1,800萬投注額輸晒。而有入場打氣之陳玉蓮亦敗興而返，仲未可以一嘗拉頭馬滋味；而馬德鐘這天則未見現身。