知唔知「人機合體奧運會」係乜東東？吳楚如半年前獲香港傷殘青年協會推薦，到蘇黎世出戰全球首屆、每四年一度嘅人機合體奧運會，佢坐住香港科技大學師生研發嘅電動輪椅，克服爬樓梯、上落坡等6個障礙，喺電動輪椅項目以3分39秒摘銀。
呢個奧運會，運動員可以用機械義肢、人腦同電腦對接、電動肢架等「人機合體」輔助技術出賽，首屆賽事吸引25國逾70名健兒參加。港隊嘅電動輪椅突圍而出，可能因為設計好先進，輪椅以坦克車底盤般嘅履帶前進，可以爬樓梯同走崎嶇路，駕駛者仲可自行調整座位角度、椅背斜度，感應器能保持輪椅平衡，避免傾側。
科大團隊花8個月研發
參與研發嘅係科大7人團隊，設計同裝配工作歷時8個月，佢哋接受《政府新聞網》訪問時話，賽前一個月邀請吳楚如每周到科大練習；呢部參賽輪椅成本約2.5萬，團隊考慮將技術普及化，並會為設計申請專利㖭呀。