當選特首嘅林鄭月娥同敗選嘅曾俊華，已向選舉事務處申報選舉開支，外界注意力集中喺佢哋兩位到底有乜金主支持，查實都估到林鄭獲中央力撐，地產商梗係踴躍表態，但薯片叔嘞喎……中央亮紅燈，邊有地產商敢同中央作對？所以捐款名單喺預計之內，反而林鄭公關麥黃小珍（Sandra）人工成32萬就令唔少人意外！
受人錢財、替人消災，其實都好公道，但係當薯片叔唔少得力要員，如羅永聰等零薪酬瞓身助選，而Sandra卻領高薪相助，又難怪令好多人議論紛紛。
「獨霸」林鄭阻進言
花生友聽聞Sandra人工出爐後，林鄭助選兵團內熱論紛紛，有人更share葉劉淑儀形容Sandra「掠水深」嘅即時新聞，等大家消消氣。有位冇支薪但有落手落腳嘅尊貴義工好氣頂，私下向友人呻呢位阿姐唔值呢個價，尤其不時搞出「關公災難」，執手尾嘅卻係佢哋。另亦有人不滿Sandra選舉期間想「獨霸」林鄭，好多人埋唔到阿姐身「進言」。估唔到呢32萬，掀起咁多是非火頭，更估唔到係葉劉幫佢哋出一口氣！
又講真，當一位公關大員，可以喺陪伴受訪者錄影訪問時插嘴搶答、唔聽傳媒電話回應查詢、以及令相關持份者畀晒嬲嬲，功力之深，可見一斑。
另一個喺奶粉陣營「被討論」嘅係麗新集團林建岳助理陸瀚民，雖然薪酬8萬蚊較貼地，但因佢都喺競選時管理fb同影片製作嘅主力，估唔到咁就使咗30萬咯！
逢周一刊出
花生友