林鄭月娥當選特首之後，大眾焦點都落喺未來首位女特首身上，一向係眾矢之的嘅梁振英離開風眼，難怪可以喘一口氣，頻頻風騷落區，卸任前都造吓勢，可能係想等官場中人知道，7.1前佢都仲係老細。
好似噚日咁，梁特就去咗元朗、天水圍一帶探訪；如果心水清會記得林鄭選舉時嘅關公災難，竟然因為天水圍遠而唔見民間團體，梁特唔知有心定無意喺fb自言5年前競選期間已到天水圍出席論壇，而過去亦常到訪呢區。
噚日朝早就家訪甄太一家，自言現屆政府推出唔少支援基層嘅措施，佢哋正係受惠家庭，佢同甄太中三兒子寒暄時更談到讀書時有一年飆高8吋嘅「事迹」。之後轉到元朗，到一家老字號麵家食雲吞麵做晏，繼而行咗陣商店同街市，買啲傳統小食、糕點。