雷神即是雷神，今日（30日）沙田馬場女皇盃大日子又係佢做主角，最終莫雷拉埋單全日五捷重奪騎師王。
當中最尾第十場二班1600米，莫雷拉呢位神級騎師勝出蔡約翰馬房熱門「東方快車」，個人整日與蔡廐合作一駒即勝，這匹馬會名譽董事榮智健名下馬首度由雷神建功，強勢敲響今季勝鼓，今場單Win及組合獨贏A1分別派34及16.5元。
莫雷拉全日勝出「承你所願」、「海嵐一號」、「鷹雄」、「新寫實派」及「東方快車」5Win，贏馬當食生菜，呢次已經係佢在港第14次單日贏五場或以上，個人今季增至144Win，遙遙領先騎師榜，拋離排第二74Win的潘頓接近一倍頭馬。賽後有五位渾身肌肉的外籍猛男馬簇擁着雷神一齊合照，令雷神顯得零舍嬌小。
講番「東方快車」，此駒上季大放光芒三捷，兼是上屆1800米香港一級賽香港經典盃季軍，但今季表現轉沉，相隔15個月後至這天終於重開勝利之門，並技術性擊倒跑第二的應屆打吡第八名「喜旺寶」，破壞咗大摩連同以「鷹雄」勝出皇太后盃的全日起孖大計。
今場二至四名順序「喜旺寶」、「上利多」及「創世紀」，四重彩派八萬七千幾。當中「上利多」久休復出今季首次參賽，因蔡明紹身體不適臨時易配梁家俊跑第三。