周日舉行嘅F1俄羅斯站正賽，排第三起步嘅平治車手保達斯一開賽就搶佔頭位，最後一圈更借馬沙嘅慢車阻擋法拉利車手維特爾，終以1小時28分08秒743首名衝線，以0.617秒力壓維特爾贏得職業生涯首個分站冠軍，更成為F1史上第五位贏得分站冠軍嘅芬蘭車手。法拉利嘅拉高倫排第三，而平治嘅「黑帝」咸姆頓就得第四。另外，艾朗素喺開賽前宣佈退賽，導致呢位35歲麥拿侖車手喺新車季連續四站都未試過完成賽事，難怪佢話：「戰車已經連續四站出現故障，今站我甚至唔可以出賽。我當然感到失望，但我喺呢個情況咩都做唔到。」至於紅牛車手歷斯亞度喺第五圈就因為機件故障而退賽。