呢屆立法會一開鑼，新丁議員嘅利益申報引起各界關注，當中九龍東直選議員、公民黨譚文豪（Jeremy），當時申報有5個住宅同商舖單位，被封為「泛民新樓王」，而且佢嘅物業唔只在港，有個仲喺美國底特律，佢當時話幾年前用咗30萬港元購入，主要係用嚟收租，絕對唔係豪宅。
八方翻查最新利益申報，發現佢4月20日更新申報，已經冇咗呢個美國物業。八方問過佢，佢笑言早一兩個月賣樓，賣出價同買入時相若，冇乜點賺，放售主因係管理較麻煩，賣咗一了百了。
Jeremy話間屋嘅租客最近搬走咗，幫開佢嘅物業管理公司又執笠，佢懶得搵過第二間就索性賣咗唔使煩喎，仲話暫時冇打算再喺美國買物業！
Jeremy本身係飛機師，會唔會四圍飛順便發掘各地「筍盤」？佢笑言去旅行路過地產舖，都會「八卦吓」，只係想了解唔同地方嘅生活質素，用幾多錢可以上到樓咋。