NBA季後賽次圈會喺周一正式開打，而馬刺喺主場迎戰火箭嘅「德州打吡」當然係最矚目嘅賽事；火箭後衞比華利（Patrick Beverley）就話馬刺控衞柏加（Tony Parker）回勇嘅話，將會成為影響戰局嘅關鍵球員。（樂視明日9:30am直播）
柏加今季喺常規賽場均只得10.1分4.5助攻，係佢自2001/02新秀球季以嚟最差表現；不過呢位34歲老將喺西岸首圈對灰熊嘅六場季後賽中，平均交出16.3分，而且仲可以保持53.3%嘅命中率。喺西岸首圈負責防守雷霆主將韋斯卜克（Russell Westbrook）嘅火箭後衞比華利，喺次圈開波前就話：「柏加嘅中距離、拋投、轉身都越來越勁，喺佢呢個年紀仲可以跑得咁快，真係令人覺得難以置信。」
速龍簽伊巴卡後實力大增
至於騎士喺同日嘅東岸次圈會主場迎戰速龍，「三巨頭」之一嘅路夫（Kevin Love）就話伊巴卡（Serge Ibaka）喺季中轉投速龍後，令呢隊東岸三號種籽實力大增，「佢同P柏德遜（Patrick Patterson）都可以打Stretch 4，拉闊球隊嘅進攻空間，而且佢早年效力雷霆時都有唔少季後賽經驗。」（樂視明日7:00am直播）