澳門特首崔世安嘅普通話喺唔開心嘅時候重溫，真係可以開心番。香港都唔失禮因為噚日迎來一位「政壇古天樂」，佢講普通話拍得住「輪軚能」古天樂，佢就係政務司長張建宗。
中段講番廣東話
「打呔返工就興奮」嘅小肥張局長，噚日出席一國兩制青年論壇唔知係咪一如以往好興奮，抑或太緊張？佢為論壇打頭陣，以普通話致辭10分鐘，嚴格嚟講，佢講嘅係港式普通話，一聽就知係講英文勁過講中文，會被建制派視作「港英餘孽」。
平時口若懸河嘅小肥張，呢次要逐粒字睇稿讀，兩制變「涼豬」、事半功倍係「私奔功倍」？中心讀成「終生」，角色聽落似「Jer色」、國內驟取聽落似「國奶」，緊張時更一度走音。
到演辭中段，佢開始搞唔掂，條脷打晒結，轉咗channel講咗句廣東話「可以為我哋香港……」，講完即時更正番做普通話；絕望之際，佢索性唔讀部份字，例如「巡迴」、「談及」等，但官方演辭仍然照出，新聞官唔夠細心喎。
最後佢陷入半放棄狀態，有啲字索性用粵語讀，如國家讀成「果家」。最蝦人讀嘅「內地與香港關於建立更緊密經貿關係的安排（CEPA）」，佢食咗N粒螺絲，終於𦧲過，最後佢連「高興」都招架唔住，讀成「高聲」。有網民聽完佢發言力撐港式普通話先夠本土，另有人則覺佢可以同崔世安齊名咯。
古天樂式嘅普通話水平，點樣證明官員都人心回歸咗先？難怪小肥張盛傳唔係林鄭嘅心水政務司司長，可能怕搞政改同京官商討時，鬧出誤會就唔好啦。
李八方
蘋民洗版
Majorie Sim：嘩！佢嗰口爛普通話真係攞膽。
Tony Kan：張局長你啲胡語真係聽到人標晒冷汗，唔使咁辛苦嘞不如講返粵語喇
Alan Lo：香港式普通話，Well Done！
諸仕平：可能又是鴨脷洲口音！？
資料來源：《蘋果》網頁