小病小痛就上載社交網站要人關心，乜呢種行為咁似收兵娘娘嘅？不過，今次講緊嘅係阿仙奴翼鋒阿歷斯山齊士，喺周三英超主場1:0擊敗李斯特城場波，尾段阻住基斯甸富治斯掟界外球搞到膊頭食波餅兼食黃牌，遲兩秒先掩面倒地仲要俾英媒寸演技差，或者因為咁先喺賽後上載嘴唇損咗嘅相為自己平反。
不過，嗰場波慘擺烏龍做輸波罪人嘅李城守將賀夫，嚟到周五仲係「懷恨在心」，喺社交網話上載一張手指損咗嘅相，仲話：「準備從阿仙奴嘅戰役康復，另一個晚上#playon」Play On啦山神，即係擺明寸你做番個硬朗真漢子啦！李城周六英超會作客西布朗，阿仙奴就會喺周日北倫敦打吡作客火併熱刺。