準地產代理考牌，竟有人出貓作弊被捕，算係奇聞。左丁山識得唔少代理，有好多都唔係大學畢業嘅，做得唔知幾醒，考牌喎，佢地一啲都唔覺得有難度。算係易考嘅試，都要出貓？恐怕係急功近利，唔刨書就空槍上陣，貪圖僥倖之故！呢類人如果真係出貓過到關，做咗代理之後，生性難改，同樣會出術誘惑老實人去買樓。
一個相熟代理專做二手樓嘅，已經捱到心灰意冷，轉行，入再培訓局讀中藥助理，讀完就去藥材舖打工，但呢行係幾死板嘅工作，佢在中藥零售店捱咗幾個月，覺得死咕咕，收入冇「生水」（佣金也），卒之又係辭工去做番地產代理，因二手樓成交淡靜，搵唔到銀，就轉去跟大老大姐專做買賣一手樓嘅後勤工作，希望夠運遇到一班有錢投資客，自己也能成為成功一手樓經紀。
一手樓經紀與二手樓經紀本來各有各做，各自風騷，但現在二手樓成交額養唔起咁多人，二手樓經紀如果搵唔到投資客、中資客、實力換樓客，往往得過做字，硬係開唔到單，為何如此，地產M提供答案。
在馬場沙圈碰到大地產商高層M先生，拉唔到頭馬就到三樓馬主廂房飲杯白酒，傾番幾句。佢話地產商最初以為梁振英會隊冧市，殊不知上任不久，在2012年便推出辣招，一辣二辣三辣，最初令地產商發茅，但睇清楚後，地產商笑到㗎㗎聲，因為知道梁振英嘅所謂壓抑需求招數，係明益佢地嘅。地產M話：「我負責賣樓嘅啫，大老闆諗通之後，知道梁振英三辣招一定會驅趕所有購買力進入一手樓市場，我地有現金，有實力，於是實行現金回贈，提供一按二按，俾埋稅務優惠，於是除非市民唔買樓，要買嘅話，我地提供嘅付款及優惠條件，係二手業主完全無法提供嘅，買一手樓實際上容易過買二手樓好多，何況我地仲送埋基本裝修及廚房設備等等！現在香港嘅樓宇購買力，起碼有七八成歸邊嚟晒我地度，飲水思源，想唔多謝梁振英都唔得。」提供咁多優惠，地產商咪會賺少咗？地產M大笑：「儍仔，提供優惠之前，我地每平方呎賣價提高幾百蚊至一千蚊，乜都返晒嚟啦，羊毛出在羊身上吖嘛。」哈，唔怪得沙頭角禁區都要賣到萬幾蚊一呎。地產M又話：「最希望林鄭真係CY 2.0，繼續維持辣招，甚至再加辣，直情係輸送金錢入我地口袋。」咁好搵，地產M不如買多幾隻馬啦，地產M話：「養馬唔贏會激氣，買樓好得多咯！」
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw