早前「六四紀念館」俾所在大廈嘅業主立案法團成日阻攔市民去參觀，被迫賣樓關門，不過支聯會講明今年六四前，會重開臨時六四紀念館，而呢個臨時六四紀念館將會係明日（30/4）正式開幕，今次唔係求其將舊館展品放入去咁簡單，而係加入體驗元素，令參觀者可以嘗試當日北京學生、市民面對嘅人生交叉點，例如面對坦克衝埋嚟，你選擇擋定唔擋？
今次六四紀念館專題展叫「六四關我？事」，八方問支聯會秘書李卓人，點解個名叫「關我？事」？阿人話因為好多年輕一代覺得六四離佢哋好遠，唔知六四同自己有乜關係，所以今次希望年輕人透過參觀六四紀念館，知道當年六四歷史之餘，亦可以感受、甚至「接觸」到六四。
所以今次支聯會加入好多互動展品，其中一個叫命運抉擇體驗，參觀人士一路參觀，一路要作出選擇，好似遇到坦克鎮壓市民，參觀者可以選擇擋坦克定唔擋坦克，不同選擇有不同結果，參觀者仲要面對絕食定唔絕食、撤離定不撤離等人生交叉點。
設真人圖書館
除咗命運抉擇體驗，紀念館仲有一個八九民運時間廊，入面放咗單車同帳篷，等參觀者唔只睇到當年北京市民用單車擋軍車，仲可以摸到實物，此外仲有紀錄片放映、真人圖書館、音樂工作坊、一人一故事劇場等。
臨時六四紀念館將於4月30日開始，係九龍石硤尾白田街30號賽馬會創意藝術中心2樓L205-208室舉行，開放時間由中午12時至晚上7時，免費入場，到6月15日結束，阿人仲話佢哋未正式開幕，已有6、7間學校預約帶學生參觀。
李八方
