懲教署噚日舉行學員結業會操檢閱儀式，今屆一共有34個懲教主任同埋135名二級懲教助理完成訓練，而其中一位畢業學員鄒廣榮，仲係前港隊成員，更曾經出戰北京奧運會賽艇項目，佢舊年退役後，發覺懲教署價值觀同運動員特質好相似，都係講求專業精神同堅毅不屈，所以佢決定投考懲教署，將運動員積極正面嘅思想，感染在囚人士，幫助佢哋積極面對更生路。
擁有十幾年賽艇經驗，搖身一變成為懲教二級助理，鄒Sir認為未來工作極具挑戰。原來佢噚日發高燒，但都撐住去完成結業步操，盡顯佢運動員嘅堅毅精神。
另一位獲頒「院長盾」嘅林雅宜，佢舊年透過公開招聘，成功由二級懲教助理升級為懲教主任。佢分享，喺懲教署工作嘅經驗有助佢今次投考。