中聯辦法律部部長王振民向有「小護法」嘅美譽，呢個並非浪得虛名嘅，話說佢噚日鬧爆香港之前，完美示範咗佢嘅講話幾咁有邏輯。是咁的，王護法噚日喺午餐會上致辭，相信佢為咗增加賓客嘅食慾，所以開炮前先詼諧咗一下，講咗個有關食煙與讀聖經嘅故事。
故事話說有位教徒問牧師，讀聖經嗰陣可唔可以食煙呀？牧師就話，梗係唔得啦，要認真讀聖經就唔可以食煙。於是教徒又再問，咁食煙嗰陣可唔可以讀聖經呢？牧師就以讚美嘅口吻，類似話食煙嗰陣都諗住讀聖經真係好有虔誠喎﹗
八方真係才疏學淺，聽完王護法講呢個故事之後丈八金剛摸不着頭腦，完全唔明佢嘅用意、有咩玄機，相信王護法想表達嘅係佢喺食飯時間講嘢就唔太好，不過賓客們食飯嗰陣聽嘢就冇問題，王護法兜咁大個圈講咗咁豐富嘅內容出嚟，一個字：高！