新民黨主席葉劉淑儀早排失意特首跑馬仔，又有退黨潮，不過事隔一排又係一條英雌。噚日葉劉同囡囡葉榮欣喺中環ifc行街，囡囡着咗一套紅色連身裙，望落非常醒神。葉劉母女行入一間專賣唇膏嘅店，初時各有各睇，囡囡最後睇到好入神，仲不時問店員意見。
葉劉見囡囡咁有興趣，專登幫手揀咗支心水唇膏遞畀囡囡，點知佢望都冇望，繼續同店員交流，葉劉即刻好冇癮咁行出門口，5分鐘後囡囡空手而回。之後佢哋行到一間賣較成熟女裝嘅店舖睇衫，今趟輪到個女全程玩電話，葉劉不停揀心水，可惜最後都係買唔成。兩母女離開ifc，喺街等司機期間，葉劉絮絮不休似向囡囡「訓話」，直到架車到先收口。