曼聯喺周四英超作客悶和曼城0:0，照計喺費蘭尼比賽末段向阿古路施展「鐵頭功」下被逐依然保住一分，算係唔錯嘅戰果，但曼聯領隊摩連奴又點會咁「順攤」？佢喺賽後受訪時就將打少個嘅矛頭放喺阿古路同球證艾堅遜身上：「我冇喺電視重播見到嗰件事，但我有同費蘭尼傾過，佢認為呢張紅牌只因為佢係費蘭尼先會出示。我亦有同艾堅遜傾過，佢認為呢張係紅牌。我會估計部份的確係紅牌，部份係因為一位好醒目、好有經驗嘅阿根廷球員。」
不過，難得保住聯賽24場不敗，摩佬亦有大讚球員爭氣：「我哋戰鬥到底，今日我哋又失去兩名球員，科素文沙喺最後階段受傷，費蘭尼就要停賽。我哋失去好多球員，情況係好艱難，但我哋踢出精采嘅風格，亦為球員們感到自豪。」