44年歷史嘅美利道停車場大廈，已納入賣地計劃準備重建，300幾個泊位嘅多層停車場，本月30日午夜12點關閉。運輸署話當日中午12點開始唔畀時租車入，月租車則可繼續入閘，但午夜12點關閉前所有車都要駛走，否則會被拖走，車主須交泊車費同拖車費。
呢塊3萬平方呎嘅地皮，隨時成為新地王，唔知會唔會又被紅色資本擸埋？前副廉政專員兼執行處首長李銘澤就話，美利道停車場大廈曾經係蜚聲國際嘅反貪大本營，廉署1978年由和記大廈遷入後，首次有自己嘅拘留中心，無數案件亦喺呢度醞釀、調查，為香港廉政奠下基石，係港人集體回憶一部份。曾幾何時，多少涉貪高官富豪、大小人物、黑白兩道喺度出入，亦有唔少海外反貪機構同執法部門來取經朝聖，直至10年前，廉署就搬去𠵱家嘅北角總部。