慢必噚日趁立法會朝早9點流會高危時間，一開會即要求點人，當一眾建制派議員倒數諗住流硬會期間，着住高踭鞋嘅工聯會麥美娟喺立法會走廊喪跑，最終喺死線前40秒趕返會議廳，力保立會免流會。麥美娟事後搞笑話，此舉惹來建制派「班長」廖長江「譴責」；經民聯林健鋒就搞gag話廖長江言論不代表個人，只係反映建制派意見。
麥美娟透露，平日周六由青衣屋企開車返立法會，只須約20分鐘，噚日已經早咗出門口，預咗車程要35分鐘，點知最終都喺西隧大塞車，相信以後可能預早一粒鐘先穩陣。至於旋風式趕至，佢自爆平日其實冇跑開步，噚日呢程短跑真係「出晒啲飲奶力」，坦言覺得啲危險，因為佢以前試過追小巴斷腳駁過骨，噚日着高踭鞋喪跑，咪話唔牙煙。