隔牆有耳:鍾國斌倡郵輪碼頭catwalk - 李八方

隔牆有耳:
鍾國斌倡郵輪碼頭catwalk - 李八方

審計署報告日前批評啟德郵輪碼頭啟用4年幾,旺季使用率最高時亦不足四成,碼頭商場舖位有一半空置,要求政府敦促營運商改善。
自由黨黨魁鍾國斌原來都好關注事件,佢透露之前過咗三招畀旅遊事務專員朱曼鈴,希望救救郵輪碼頭,包括每逢船期到時,安排香港年輕設計師喺碼頭搞巿集,令外國遊客一落船就買到香港特色產品。
第二招則係利用碼頭長期空置嘅長廊做fashion騷,令設計師慳番唔少興建天橋嘅成本。
最後一招則係用碼頭長期空置地方搞展覽,佢話諗過今年9月喺郵輪碼頭搞大型座談會,點知碼頭方面索價廿幾萬,貴到佢即時知唔使諗。佢引述之前同朱曼玲提出上述好橋時對方猛話:「正啊!好啊!」點知拖到俾審計報告鬧都未有回應㗎啫。