公民黨下月12號會喺九龍灣宏天廣場舉辦11周年黨慶晚宴，同新民黨撞啱同一日喎！為咗吸引大家，公民黨今年扭盡六壬，相對典型嘅，有余若薇嘅墨寶拍賣，同有名為「甜酸苦辣」嘅手工啤酒，更特別嘅就係黨魁楊岳橋帶隊「削肉救黨」，同主席梁家傑嘅執垃圾籌款。
先講吓套手工啤，一套4支，分別名為「甜夢、酸雨、苦果、辣妹」，一套底價888蚊，夠晒好意頭，只有8套，真係要買趁手。至於傑哥嘅行山執垃圾籌款就真係破天荒，大家捐得多，傑哥就執得多，若然捐夠20萬，傑哥更會以神秘造型去執垃圾！黨魁楊岳橋就連同4名黨友，譚文豪、鄭達鴻、錢偉健同埋余德寶，實行「削肉救黨」，即係佢哋會由噚日開始減磅，希望減得多、籌得多，目標都係籌20萬番嚟，八方喺度預祝佢哋馬到功成啦！