之前盛傳林鄭月娥上場，至少3名常任秘書長會劈炮，最有資格評論呢個傳聞嘅梗係當年盛傳同林鄭喺發展局鬧不和、兩年幾前離開熱廚房嘅前AO歌王楊立門（Raymond）。Raymond噚日介紹嚟緊主持港台新節目《香港有你》，被問到對林鄭有乜睇法時冇直接評論，只係話做發展局常秘時好辛苦，但唔係因為林鄭，而係局方有個項目文件成半個人咁高，要消化兼開會時回應唔易㗎。
自稱好貼地嘅Raymond話喎，退休後八達通隨身搭車周圍去，到過唔同港鐵站，聽落去有啲話中有骨。
讚葉劉薯片係好上司
原來佢下月就出任廠商會行政總裁，佢話退休後好多人向佢招手，最終揀咗廠商會，因為鍾意做工商，以前做工商局時跟過葉劉、唐唐同薯片叔，覺得3個都係好唔錯嘅老細。
至於佢做主持嘅節目，邀請唔同範疇嘅兩代人講吓廿年回歸變化，由音樂、建築、醫學到電影都有，有集佢訪問鋼琴家李嘉齡同張緯晴會開金口，節目5月17日晚6點首播。