噚日恒隆集團（010）與恒隆地產（101）舉行股東會，主席陳啟宗遇上「進擊的小股東」。話說有名小股東不滿恒隆地產派息多年不變，仲喺2014年減咗一仙，指公司對股東不負責任，就係呢句「不負責任」，惹來陳啟宗強烈反彈，嬲豬爆出一句:「你唔滿意咪賣咗佢囉！」
恒隆有唔少長情小股東，好多都係老友記，所以陳啟宗噚日開會都好有耐性解釋，話唔加派息係一個策略性問題，指公司轉型做收租佬，如果因應賣樓收入增加就加派息，好易無以為繼。過去十年，公司維持派息反而係對股東好嘅方案。
但呢位小股東就唔多認同，質疑點解管理層年年加薪，好似董事總經理陳南祿舊年加薪4.1%，股息就年年照舊，會後再追問陳啟宗，搞到陳啟宗唔知點好咁。
雖然派息被股東質疑，但恒隆都好識做，除一般點心盒，又派旗下商場租戶嘅優惠券畀小股東，叫做多元化回饋股東。