大摩說：「我的父親常說努力就會帶來好運，而此駒就是一位明星。」
盃王大摩旗下咁多出眾賽駒，唔知佢大讚哪駒係粒星咁把炮呢？之唔係出戰周日（30日）女皇盃（2000米）嘅「明月千里」囉，呢匹上屆馬王將會再次夥拍OK哥布文，睇個勢就係想成為第一匹可蟬聯呢項高達2,000萬總獎金國際一級賽嘅本地馬。
原來大摩接手呢匹馬王嘅時候，已對「明月千里」印象好深刻，覺得呢匹馬體形瘦、腿長，體重上升之後肯定有一番作為。大摩就話要令一匹馬成為馬王，唔單止要睇匹馬本身質素。
大摩就話：「『明月千里』是匹很情緒穩定的賽駒，皆因有很好的馬伕照顧，所以馬匹跟馬伕的關係是相當重要。」
所以要成就一匹馬王真係要靠各方面配合，絕對一啲都唔容易。而大摩仲話今次有晒主場之利，絕對覺得呢匹馬王食硬女皇盃。
今仗鞍上人OK哥布文亦對馬迷俾晒OK訊號，並認為「明月千里」係一匹超好嘅馬。布文說：「我相信『明月千里』表現將會更出色，因牠今季只跑過三場，仍充滿競賽意慾，我相信此駒在季尾會有出色表現。」