【本報訊】CEC國際（759）旗下阿信屋昨起推全線七折優惠，老闆林偉駿向本報表示，有近一年無推出過如此大規模折扣，「今次盤點想早啲散貨，供應商都肯平啲畀我哋，證明嗰市真係好差。」他稱，目前阿信屋有228間店，亦即較中期業績所講，「預計關閉或重整13間分店」的目標更多。
老闆：限韓令導致供應商減價
根據網頁顯示，自今年3月初起集團已陸續關閉759 Toysland、759家品市場及759寢具屋等店舖，截至4月中亦共有250間分店，而他昨於訪問則提到料今年10月將會大減至約220間。
林偉駿表示，由於早前內地「限韓令」，大堆日韓貨未能通關，被迫留在香港，供應商於是向本地零售商埋手，減價求售，「我哋為咗搶貨，費事讓對手拎咗貨後減價打我哋，所以我都掃咗幾十個貨櫃嘅貨，3月嘅貨已經清晒，4月嘅仲未賣晒。」
今次阿信屋除了正價、公價貨，連一向不會再減價的「折實價」及「促銷價」貨都納入七折促銷行列，林偉駿直言「已經有近一年未試過減咁多價」。他表示生意跌了9個月，惟今年2月有好轉，上月亦按月有所回升，並指「4月都升到幾個百分比，𠵱家唔跌已經好好彩。」
他續指，由於之前心雄開太多舖，部份捱貴租，到今年10月前都不會再擴張，更會關十幾間阿信屋，主要是街舖，再租3間領展（823）或房署舖，稱「暫時都唔會諗擴張同新嘢住。」
759阿信屋母公司CEC國際去年12月時公佈的中期業績由盈轉虧，轉蝕2,993萬元，2015年同期則賺809萬元，收入微升1.5%至24.59億元，每股虧損4.46仙，不派末期息。