正所謂「High-tech揩嘢、Low-tech撈嘢」，搞越High-tech嘅嘢，越容易「揩嘢」。樂視就係一個活生生的例子。傳樂視創辦人兼CEO賈躍亭兩年內，在汽車業務狂燒350億元（人民幣‧下同），搞電動車初創公司樂視FF（Faraday Future），導致債務纏身，仲拖累樂視其他業務。
賈躍亭早年成功將網絡電視樂視網（300104.SZ）搞得有聲有色，不過佢唔滿足於影視業務，2012起開始涉足電視機、手機、汽車等行業，百足咁多爪。業務極速擴張的同時，需要投入的資金激增，而電動汽車研發就似一個無底深潭，賈躍亭的資金鏈開始出現問題，所以樂視今年被追數、裁員、遲出糧、變賣資產的新聞沒完沒了。
搞High-tech又未必一定「揩嘢」嘅，如果一舉成功，得到嘅回報能夠以一頂百，好似Apple、Amazon、阿里巴巴等。睇返燒錢最多嘅樂視FF電動車搞成點？樂視今年1月初推出首款量產電動車「FF91」，速度方面聲稱快過Tesla Model S。不過，賈躍亭在發佈會當日，親身示範自動泊車功能就蝦碌。部車幾時有得賣？樂視就聲稱明年可交貨，但早前傳媒踢爆樂視美國車廠十劃都未有一撇，而車廠規模，更加要大縮水八成。
賈躍亭後來獲融創（1918）董事長孫宏斌出手打救，科水168億，不過講到明唔注資手機及電動車業務。上周有報道稱，孫宏斌親身考察樂視FF，好似有意與聯想投資11億美元於電動車業務，不過隨即被孫宏斌否認。願望落空，賈躍亭唯有繼續撲水，傳計劃出售5萬平方呎北京地產項目，套現29億元，用於發展智能手機、電視及電動車業務。
財困問題未解決，現時樂視嘅資金鏈就似一條被大力拉扯嘅橡筋，瀕臨斷裂邊緣。樂視網本周三公佈今年第一季業績顯示，大股東賈躍亭現時所持的25.67%股票，其中超過97%進行了股權質押，是上市以來，賈躍亭股份質押比例最高的一次。另外，他實際控制嘅樂視控股，更加質押了全部持股。在如此高的股份質押比例下，一旦樂視網股價大跌，將有機會觸及平倉線，而賈躍亭手上流動資金緊絀，分分鐘會爆倉，甚至動搖大股東嘅地位。呢個就係樂視點解一有負面消息傳出，賈躍亭就申請停牌過一過冷河。樂視網自4月17日停牌至今，停牌前股價報30.68元。
風吹知
本欄逢周五刊出