香港球手伍家朗周四喺中國武漢舉行嘅亞洲羽毛球錦標賽男單次圈，只打36分鐘就以直落兩盤擊敗馬來西亞嘅張崴烽，晉級八強會硬撼東道主球手諶龍。（有線62及202台今日3:55pm直播）
世界排名第10嘅家朗喺開局初段連攞五分，先以6:3領先世界排名44嘅張崴烽，不過今場戰況相當緊湊，雙方曾10次打成平手，不過家朗喺尾段頂住壓力並以21:18先拔頭籌。家朗喺第二盤乘勝追擊，一度比數擴至7:0，最終以21:9勝出。至於諶龍、林丹、李宗偉等球手亦順利贏波。另外，香港組合李晉熙/周凱華喺同日嘅混雙次圈，亦以直落兩盤21:16、21:19擊敗中華台北嘅李洋/許雅晴，晉級八強會對張楠/李茵暉。