睇片卡吓卡吓大家都試過，但估唔到互聯網巨頭阿里巴巴執行副主席蔡崇信都會遇上。
事緣阿里巴巴創業者基金聯同數碼港及香港科技園合辦咗個「JUMPSTARTER 2017」創業比賽，宣傳記招喺銅鑼灣阿里巴巴辦公室舉行，佢哋原先想播條片介紹個活動概念，點知竟然卡住咗！
你以為一下就完咩？少年你太年輕喇，之後主辦單位連播兩次都繼續卡住，真係估唔到喺互聯網巨頭辦公室睇片都咁難。
蔡崇信之後幽自己一默，叫大家如果有網絡播片嘅解決方案可以搵佢呀。最後片就睇唔成，主持人柳俊江補飛講句:「概念太抽象，可能要停頓畀大家思考吓」，然後叫大家之後上網睇番。完。