上星期愛看足球比賽的朋友，好可能睇波睇到有熊貓眼，乜唔係啫，周中有歐聯準決賽第二回合，皇馬與拜仁打到加時決勝負，祖雲達斯在巴塞隆拿上演百分百完美防守，不讓NSN（美斯、蘇亞雷斯、尼馬）越雷池半步；又有李斯特城主場欲反勝馬德里體育會，全場埋身肉搏，緊張異常；再早一啲，曼聯迎戰車路士，摩連奴智勝干提，竟然採用英超從來唔用嘅「貼身膏藥」戰術，派靴里拉全場二仔底死跟車仔主將夏薩特，由於雙方速度差唔多，靴里拉高大少少，於是90分鐘內令夏薩特無法擺脫膏藥，失去助攻作用，間接令中鋒哥士達得到零供應，只係行行企企，未有過一腳好射門。摩連奴頭腦醒，變通快，況且曾執教車路士，知道晒對方強弱點，呢場曼聯能夠贏二比零，摩連奴知人善用，居功至偉，其中大膽將伊巴謙莫域治放在後備席上，讓兩員小將凌格特與賴殊福特憑速度衝散車仔後防，更是大膽之作。
不過事後先知道，車路士不少球員當日曾受病毒感染，但干提不以之為藉口，提都唔提，唔怪得車仔球員對曼聯嗰陣，好似食咗豬油包咁啦。休息過後，上星期六對熱刺爭入足總盃決賽，車仔球員就明顯速度快好多喇，干提唔知係唔係向摩連奴偷師，上半場雪藏夏薩特與哥斯達，待下半場雙方踢成二比二之後，先至放兩名主將出場，夏薩特果然如猛虎出柙，兼且無人貼身纏佢，成個生晒，一射一傳皆造成入球，就此以四比二掃走踢得相當好，但後備兵員始終質素差少少嘅熱刺。睇嚟下屆熱刺仍要擴軍，中前場搵多兩至四位猛將先至可以爭奪英超冠軍，否則始終係做二奶三奶。
另一場準決賽係阿仙奴對曼城，場波就冇車仔對熱刺咁好睇喇，曼城教練加迪奧拿執教以來，年年起碼攞一次冠軍獎盃，但對住阿仙奴就冇運行，史特寧入一球，竟被判唔算，完場前十分八分鐘，兩次埋門中柱，去到加時，曼城球員好似慢晒，就係咁俾山齊士偷襲成功，二比一氣走曼城，令阿仙奴得到決賽席位，但阿仙奴係僥倖有運啫，決賽對住車路士，睇牌面仍以車仔捧盃希望高。睇到攰晒之餘，還有一場西班牙國家打吡，皇馬對巴塞，雙方落力演出，好睇之至，美斯素來係大戰明星，今場勁敵C朗啞火，美斯則大顯神威，在補時射入在巴塞嘅第500球，絕殺皇馬，真神人也。當今球迷有幸，可以透過直播，見證「超級球星」表演神級技術，想當年皇馬有史拔芬奴，路斯卡斯兩大射手，橫掃歐洲，但佢兩位生不逢時，未有優質高清電視全場直播，真可惜，左丁山未曾睇得到佢地嘅絕技。
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw