跑馬地豪宅區向來受用家及投資者追捧，前臨馬場嘅逸廬，最新錄得成交，買家係紀惠集團主席湯文亮兒子湯振傑（Jonathan），湯公子證實係換樓自住。
由此可見，湯文亮一家人都鍾意買港島區老牌名廈，湯文亮本身住大潭名廈陽明山莊，女兒湯振玲兩年前豪花8,570萬元，連掃大潭老牌豪宅紅山半島4個單位投資，一嚐做業主滋味。
Jonathan買入嘅逸廬單位，實用面積2,003方呎，購入價4,300萬元，實用呎價21,468元，以港島區豪宅呎價算平，鄰近新盤北角維港頌呎價都要3萬元。噚晚Jonathan以WhatsApp回覆，證實買入單位作換樓之用。
逸廬一向少有放盤或成交，對上一宗成交追溯至2016年1月，B座低層B室以3,518萬元連車位沽出。據悉，男藝人張家輝亦住呢度。