差唔多到7月，新政府高官班底好似仲未齊腳，華華當然最關心財金官員人選喇，咁啱噚日港交所（388）開股東會，席上唔少董事都有傳係財金官員人選㗎。
好似身兼創興銀行（1111）副主席嘅梁高美懿（Margaret），但係Margaret開完會斯斯文文咁話唔講喇，唔講喇，就急急腳走。
剛剛卸任董事嘅東泰主席李君豪（Vincent），一直被視為「梁粉」，被問到落莊之後會唔會選議員、入政府，繼續服務金融界之類，佢就耍手擰頭，話一定唔會係華華估嘅嘢喎。
港交所主席周松崗亦笑笑口，話暫時未有董事因為要入政府而向佢請辭。唔通位位高人都費事入熱廚房，情願留喺金魚缸？
講番Vincent，好多經紀擔心，Vincent卸任後，港交所董事會再無中小型經紀代表。Vincent用蚯蚓做譬喻，蚯蚓只係細細一條，但佢哋幫手翻鬆泥土，對農夫種田非常重要，所以唔好睇輕中小企、細經紀、散戶，佢哋規模細，但對整個市場生態舉足輕重，希望將來董事會嘅代表會平衡啲喇。